DC - MBULU AWATAKA VIONGOZI NA WATENDAJI KUZINGATIA UADILIFU NA UWAZI KATIKA MATUMIZI YA MICHANGO YA WANANCHI.

Kurushwa hewani: June 27th, 2023

Mkuu wa wilaya ya Mbulu Komred Kheri James ametoa maelekezo hayo leo katika ziara ya kusikiliza kero za Wananchi na kukagua miradi ya maendeleo katika Kata ya Maghang na Haydom katika Halmashauri ya wilaya ya Mbulu.    

Akizungumza katika mikutano miwili ya kata hizo, Komred Kheri James kaeleza kuwa hamasa ya Wananchi ya kuchangia shughuli za maendeleo, isitumike kama kichaka cha watendaji na viongozi wachache wasio waaminifu kujivunia fedha hizo kwa maslahi binafsi.    

Komred Kheri James amesisitiza pia, Ushirikishwaji wa Wananchi katika kuibua miradi, kuidhinisha michango na kusomewa mapato na matumizi ni jambo la lazima na sio hisani ya viongozi kwa Wananchi.    

Pamoja na mambo mengine Komred Kheri James amewapongeza Wananchi wa Kata ya Haydom na Maghang kwa kasi yao kubwa ya kuchangia shughuli za maendeleo, na amewaahidi kuwa Serikali itaongeza ufatiliaji katika michango yao, na kuchukua hatua kwa wale wote watakao jihusisha na ubadhirifu wa fedha hizo.       

Katika ziara ya Kata hizo mbili ilio hudhuriwa pia na viongozi wa Halmashauri ya wilaya ya Mbulu, watumishi na viongozi, Mkuu wa wilaya ametembelea miradi ya Elimu yenye jumla ya shilingi milioni mianne hamsini.

#Kwapamoja,Tunaijenga Mbulu yetu.