WATAALAMU WATAKIWA KUKAMILISHA MIRADI KWA WAKATI ILI IWEZE KUHUDUMIA WANANCHI.

Kurushwa hewani: April 12th, 2024

Na, Ruth Kyelula, Mbulu – DC

Mkuu wa Wilaya ya Mbulu, Veronica Kessy amewataka wataalamu na menejimenti ya Halmashauri ya Wilaya ya Mbulu kukamilisha mapema mradi wa hospitali ya Wilaya ili uweze kuwahudumia wananchi wa wilaya hiyo.

Mkuu wa Wilaya Veronica Kessy akiwa na wataalamu katika hospitali ya Wilaya, wakati wa ziara yake katika hospitali hiyo iliyopo Dongobesh.

Hayo yalisemwa na Mkuu wa Wilaya ya Mbulu wakati wa ziara yake ya kikazi katika kata ya Dongobesh ambapo ilipo makao makuu ya Halmashauri ya Wilaya ya Mbulu na kuanza kukagua ujenzi wa hospitali ya Wilaya, kuongea na kusikiliza kero za wananchi katika viwanja vya Dongobesh na kuzungumza na watendaji kata, vijiji na wakuu wa idara wa Halmashauri April 09,2024, Dongobesh wilayani Mbulu.

“Hapa tulipofikia tukimbize, yale majengo yakamilike ili huduma ifunguliwe rasmi kwa wananchi, nahitaji ile hospitali ifanye kazi. Kwahiyo injinia asimamie yale maelekezo yote tuliyotoa na yale maelekezo yaliyotolewa na kamati ya Bunge ya LAAC yafanyiwe kazi na kila mtu afanye jukumu lake.” Alisema Mkuu wa Wilaya Veronica.

Wananchi wa kata ya Dongobesh wakimsikiliza Mkuu wa Wilaya Veronica Kessy wakati wa ziara yake katika kata hiyo.

Aidha amewataka watendaji wa kata na vijiji wasimame kwenye nafasi zao na kushughulikia migogoro yote, na inayowashinda wapeleke ngazi ya kata,na wakishindwa wapeleke ngazi ya Wilaya, msikae na migogoro.

Naye katibu Tawala wa Wilaya ya Mbulu, Paulo Bura alisema kuwa, anamshukuru mkurugenzi na timu yake kwa maandalizi mazuri ya ziara zote mbili za tarafa ya Haydom na Dongobesh, na amewaomba wataalamu kufuata maelekezo yote ya Mkuu wa Wilaya aliyoyatoa ili miradi iweze kukamilika na wananchi wapate huduma iliyokusudiwa.

Kwa upande wa Mkurugenzi wa Halmashauri ya Wilaya ya Mbulu Abubakar Kuuli, amesema kuwa amepokea maelekezo yote aliyoyatoa Mkuu wa Wilaya na kuahidi atayafanyia kazi.Na amemshukuru kwa ziara yake katika kata ya Dongobesh.